<
ຍິນດີຕ້ອນຮັບມາສູນຖ່າຍທອດເຕັກໂນໂລຊີ ລາວ - ຈີນ

ຮອງນາຍົກ ຮ່ວມຊົມງານວາງສະແດງ-ຕະຫລາດນັດ ເຕັກໂນໂລຊີລາວ 2018

ເວລາອອກ:2018-10-15 21:23:38   ຄວາມເປັນມາຂອງບົດ:KPL

ໃນວັນທີ 12 ຕຸລາ 2018,  ທີ່ສູນການຄ້າລາວ-ໄອເຕັກ ໄດ້ມີພິທີເປີດງານວາງສະແດງຕະຫລາດນັດເຕັກໂນໂລຊີລາວ 2018 ຫລື  LAO TECHMART 2018.

ໃນໂອກາດດັ່ງກ່າວ,  ທ່ານ ບໍ່ວຽງຄຳ ວົງດາລາ ລັດຖະມົນຕີ  ກະຊວງວິທະຍາສາດ ແລະ ເຕັກໂນໂລຊີ ໄດ້ກ່າວວ່າ:  ງານວາສະແດງຄັ້ງນີ້,  ໄດ້ເປີດກວ້າງເຊື້ອເຊີນບັນດາສະຖາບັນຄົ້ນຄວ້າ,  ສະຖາບັນການສຶກສາ,  ມະຫາວິທະຍາໄລພາກສ່ວນທຸລະກິດ ຈາກພາຍໃນແລະ ຕ່າງປະເທດເຂົ້າມາຮ່ວມວາງສະແດງ,  ພ້ອທັງນຳເອົາເຕັກໂນໂລຊີໃໝ່ເຂົ້າມາວາງສະແດງແລະ ສາທິດຈາກຕ່າງປະເທດ ເພື່ອການຮ່ວມມື  ສົ່ງເສີມການຖ່າຍທອດນຳໃຊ້ເຕັກໂນໂລຊີທີ່ກ້າວໜ້າ,  ທັນສະໄໝ ແລະ ເປັນມິດກັບສິ່ງແວດລ້ອມເປັນຕົ້ນແມ່ນ ເຕັກໂນໂລຊີ ຊີວະພາບ ແລະ ກະສິກຳ,  ຂໍ້ມູນຂ່າວສານແລະ ການສື່ສານ,  ພະລັງານທົດແທນ ແລະ ວັດສະດຸໃໝ່,  ວິສະວະກຳ ແລະ ອອກແບບການຂົນສົ່ງ,  ການແພດການປຸງແຕ່ງອາຫານ,  ໄຟຟ້າ-ເອເລັກໂຕນິກ ການສ້າງເປັນເມືອງທັນສະໄໝ  ແລະ ການພັດທະນາຊັບພະຍາກອນມະນຸດ

ງານດັ່ງກ່າວ,  ຈັດຂຶ້ນໃນ ລະຫວ່າງ ວັນທີ 12-21 ຕຸລາ 2018  ທີ່ສູນການຄ້າລາວ-ໄອເຕັກ,ເຊິ່ງເປັນກິດຈະກຳໜຶ່ງ ທີ່ປະກອບສ່ວນ ເຂົ້າໃນການສະເຫລີມສະຫລອງວັນວິທະຍາສາດແຫ່ງຊາດວັນທີ 12 ຕຸລາ ແລະ ວັນມາດຕະຖານໂລກ  ວັນທີ 14 ຕຸລາ.